قصة «اللهو الخفي».. شوبير يحذر من أيادي خفية تعبث بالأهلي من داخل النادي
ألمح الإعلامي أحمد شوبير إلى وجود أشخاص تعبث بالنادي الأهلي من داخله، دون أن يسمي أشخاصًا بعينها، محذرًا من قصة «اللهو الخفي»، ومعتبرًا أن الهجوم على الإسباني خوسيه ريبيرو، مدرب الفريق، والمطالبة برحيله جزءًا من هذا المخطط.
وقال شوبير، خلال تصريحات إذاعية، «أنا عند رأيي وبقول رأيي، نختلف نتفق معنديش أدنى مشكلة، وكلامي هقوله يعني مش معنديش حرج ولا كسوف فيه».
وأردف قائلًا: «في ناس بتيجي من البداية يا إما تقرر المساندة يا إما تقرر إنه لا إحنا عندنا تارجت اشتغل عليه»، مضيفًا: «التارجت مثلا إنه لأ الراجل رييبرو ده ميكملش!! وللأسف الناس دي ممكن تكون من داخل البيت أنا بتكلم كلام أنا مسؤول عنه بنسبة 100%».
وتابع قائلًا: «أنتم عارفين زمان قصة اللهو الخفي؟ هي كده قصة اللهو الخفي من داخل البيت.. يعني طالع اختراعات وبتاع، لكن تظل كلمة اللهو الخفي دي موجودة يعني».
ومضى يقول: «في حاجة ممنهجة بصرف النظر عن آراء البعض اللي بحترمها جدًا.. ومنها آراء البعض اللي عايزين رييبرو يمشي، حقهم.. آراء البعض اللي شايفين مدرب دون المستوى، حقهم، أو إن شايفين اللاعب الفلاني دون المستوى، حقهم».
واستطرد قائلًا: «لكن أنا خدها بس معايا، الدنيا كانت هايجة كده الأسبوعين اللي فاتوا على إيه في النادي الأهلي؟ ودلوقتي هدوء خالص ليه؟»، مضيفًا: «في ناس عايزة تدير الأمور بمزاجها وبتوحي للناس إنه لو أنت مخدتش رضايا مش هتعرف تنجح، اللي هو خد رضايا أنا الأول عشان تعرف تنجح».
وختم حديثه قائلًا: «أنا اه ممكن أكون مش مسؤول إداري أو حاجة لكن أنا يا باشا المفاتيح كلها في أيدي».
